السيسي : العاصمة الادارية ليست من موازنة الدولة
- عبد الفتاح السيسى
- 2019/03/11
أكد الرئيس عبدالفتاح السيسى، رئيس الجمهورية القائد الأعلى للقوات المسلحة، أن المشروعات الجديدة تكلف خزينة الدولة 4 تريليونات جنيه، مشيرًا إلى أنه تم التعاقد على تطوير 290 عربة قطار، وشراء 1300 عربة مختلفة، بجانب التعاقد على 200 جرار جديد، ورفع كفاءة 81 جرارًا، والتعاقد على 6 قطارات كاملة مكيفة بالجرار وعرباته كاملة خلال العام ونصف المقبلين، وتوريد 40 عربة قوى، و300 عربة سكة حديد لنقل البضائع .
وتحدث خلال الندوة التثقيفية للقوات
المسلحة للاحتفال بيوم الشهيد، والتى عُقدت بمركز المنارة للمؤتمرات، عن الإنجازات
التى يشهدها قطاع النقل والسكة الحديد، قائلًا: إنه «لا يجب أن نظلم من سبقونا»، مضيفًا أن السكك الحديدية
ستكون بالشكل الذى يستحقه المصريون، من خلال المحطات والسكة والعربات والتحكم وكل
شيء بفضل الله .
وتابع: «أى حادثة يكون لها تأثير على الناس والرأى العام ورد فعل، ولكننا عاوزين نوصل سكة حديد للسودان وإثيوبيا وأفريقيا ضمن مبادرتنا ورؤيتنا من أجل بنية أساسية للقارة الأفريقية ».
وأضاف: «30 يونيو 2020 لازم ننطلق وتشوفوا كل حاجة زى الكتاب ما بيقول»، موجهًا رسالته للفريق كامل الوزير، قائلًا: «يا كامل كل حاجة زى الكتاب ما بيقول ».
وأشار الرئيس إلى أنه يتم العمل على مد خطوط السكك الحديدية إلى السودان وأفريقيا .
وتحدث الرئيس السيسى، عن حادث قطار محطة مصر، قائلًا: «عملنا فى قانون الخدمة المدنية إجراءات عشان نظبط أداءنا، مش عشان نعذب ولادنا.. طيب ينفع واحد واخد استروكس ويركب قطر.. ويبقى صاروخ طاير عل الأرض ويضيع ولادنا وأهلنا فى المحطة.. لا ».
وأضاف: «لن نسمح بذلك مرة أخرى، وسنحاسب القانون اللى بيتعاطى مخدرات سيتم انتهاء خدمته فورًا، والتحاليل يجب تنفيذها بصدق وأمانة.. متجيش بعد كدا وتقول عنده أولاد.. طيب واللى ماتوا معندوهمش أولاد وأهل؟.. لا عندهم.. وهذا الأمر على كل مرفق ».
وواصل: «من ضمن الشائعات أن البعض قال إننا تحايلنا على كامل الوزير منذ 5 أيام.. هو إحنا عندنا فى الجيش يا كامل بنتحايل على حد؟.. كامل قال لى أنا تحت رجل مصر فى أى وقت، بس كان لازم موافقة البرلمان، وهو فى إجازة الآن.. دى الحقيقة يا مصريين.. لازم البرلمان يوافق على الوزير اللى نرشحه ثم يحلف اليمين.. طيب البرلمان فى إجازة ».
وأضاف: «أعطى لهذا المرفق واحد من أحسن ضباط الجيش.. وحجم الجهد الذى يقدمه لصالح المشروعات القومية أكثر من هائل وضخم جدًا.. وإحنا عاملين شغل يخلص 30 يونيو 2020 بتكلفة تصل لـ4 تريليونات جنيه، نصفهم خلص والباقى جارٍ استكماله.. الدولة بتحارب الإرهاب وتقاتل وتنزف دم وتشتغل.. يد رافعة السلاح ويد تبنى ومش هتقف ».
وتابع: «حجم التحدى كبير والناس تستعجل النتائج، وبالتالى قلنا كامل الوزير يتولى مسئولية النقل، والهيئة الهندسية بها ضباطها اللى يكملوا الشغل، ويتولى المهمة.. وأنتم سترون مرفق كالحديد فى 30 يونيو 2020.. وبقول لكامل: لك كل الدعم منى ومن المصريين والجيش والشرطة وأجهزة الدولة لينجح هذا المرفق، ولو عاوز ضباط لصالح الورش وكل ذلك معنديش مشكلة، ولا أعتقد أن وزير الدفاع سيبخل عنك أو عن مصر.. كان عندى مشكلة كهرباء وغاز وشبكة قومية للطرق وبفضل الله خلصتها.. كان لازم نعمل كدا ونتحمل تبعاته وتزعلوا من السيسى ميجراش، لكن المهم البلد تعيش.. فالفكرة مش لأجل خاطر نعيش نضيع شعب ».
ورد الرئيس عبدالفتاح السيسى، على الشائعات التى أطلقها البعض على حملة 100 مليون صحة، قائلًا: «فيه شائعات كثيرة تقول أن التطعيم الذى يتم فى حملة 100 مليون صحة يؤذى الناس.. إحنا نقدر نعمل كدا فى أنفسنا وأولادنا؟!.. ياااه.. البعض يصدق ذلك ».
وأوضح: «الحملة للتخفيف على أهلنا، فقد كنت متألمًا من فيروس سى وموجوع كمصرى لأهله وناسه، وقوائم الانتظار التى كان مطلوب التصدى لها 18 ألفًا، بينهم 6 آلاف عملية تم الانتهاء منهم، وتم إجراء دراسة حول التكلفة التى وصلت 235 مليون جنيه لعلاجهم، ولكننا استطعنا إنجاز أكثر من 100 ألف حالة على قوائم الانتظار.. إحنا كحكومة ودولة ومسئولين، عاوزين نخفف عن أهلنا ولا نضيعهم؟.. دول 100 ألف من 100 مليون، وبقول ذلك عشان كل أسرة تنتبه مع أبنائها ».
وقال الرئيس عبدالفتاح السيسى، فى رده على انتقادات البعض للعاصمة الإدارية: «البعض يقول هيعملوا 200 مليار جنيه فى العاصمة الإدارية بنية أساسية.. طيب أسيوط الجديدة، ورشيد، والمنيا الجديدة، والسويس الجديدة.. يا جماعة اللى بيطرح الطرح ده عوز يألمك ويوجعك ويزعلك وينغص عليك عيشتك ».
وتابع الرئيس السيسى: «طيب والله والله والله كل المدن الجديدة مش معمولة من موازنة الدولة.. طيب تقولولى بتعملوا إيه.. بتحفروا وتجيبوا فلوس من الأرض؟.. لا إحنا بنحول الأراضى اللى بلا قيمة إلى أراض ذات قيمة.. بنعمل طريق فى أسيوط الجديدة ومحور لنعبر به بين النيل الغربى والشرقى، وعملنا حاجة وأراضى ونطرحها للبيع، والفلوس دى بندعم بيها الشغل، وهذا الكلام ينطبق على العلمين والمنصورة وأسيوط والمنيا، وأى حاجة كذلك، وبنحاول تحويل الأراضى محدودة القيمة إلى أراض ذات قمية مرتفعة، من خلال تطويرهم بما فهيم العاصمة الإدارية الجديدة، والفلوس بنعمل بيها بنية أساسية، وقلت الكلام قبل ذلك وأقوله مرة أخرى ».
وواصل: «ممكن أطلع كل يوم فى التلفزيون، بس انتوا تزهقوا منى ومعنديش ملكات الإعلاميين وأنا أتحدث كمصرى إنسان منكم، وأنا بقولكم أنا مش رئيس لكم أنا واحد منكم، ووالله لأقف أنا وأنتم أمام الله أسألكم كما تسألونى، وأحاسبكم كنا تحاسبونى، لأن إحنا بعمل كدا عشان خايفين عليكم ».
وأضاف: «السنة فيها 52 أسبوع، عدد أسابيع المظاهرات فى مصر، خلال 2011 و 2012 و 2013 و 2014 بمعنى 200 أسبوع مظاهرات فى 4 سنوات.. سياحة إيه اللى تشتغل؟ ومصالح إيه اللى تتحرك وتجارة إيه اللى بتمشى،.. هو إحنا آخر النهار بناكل ولا نقول إحنا فى المظاهرات؟.. الاحتياطات اللى راح فى سنة ونصف منذ 2011 رغم تشكيله خلال 20 عامًا، وكان 38 مليار دولار، واتشطب لأن سنة ونصف الجزء الأكبر منهم ».
وتابع: «الدول جنبنا تتحدث عن الأوضاع الاقتصادية والظروف، وهى تضيع فى بلدانها، وكل الكلام دا له ثمن ولازم يدفعه الشعب، والأولاد الصغار والأجيال القادمة.. الاستقرار استثمار ».
وأضاف السيسى «لا أخشى على المصريين من الخارج ماداموا صفا واحدًا بالداخل ».
وقال الرئيس عبدالفتاح السيسي، إن جميع الشهداء العسكريين والمدنيين قدموا ثمنا كبيرا حتى يعيش الوطن فى سلام وآمان .
وأضاف «يا ترى بندى الجيش والشرطة مرتبات إيه؟، يا ترى بيقولونا عاوزين فلوس وبيقولوا مش هانكمل لحد ما تدولنا، لا حصلت ولا هاتحصل، والتمن اللى تم دفعه مايتعوضش خالص، ولو قلتلكم أرقام مرتبات الجيش والشرطة هاتستغربوا قوى، أرقام متواضعة وطول عمر الجيش والشرطة كان كده.. ومحدش أبدا طلب زيادة ».
